Giorgio Chiellini e ka cilësuar Sergio Ramosin si mbrojtësin më të mirë në botë, dhe ndërhyrjen e tij kundër Mohamed Salah në finalen e Ligës së Kampionëve në vitin 2018 e ka quajtur si një ndërhyrje mjeshtërore.

Ramos kishte lënduar në mënyrë të diskutueshme Salah në fitoren 3:1 të Real Madrid kundër Liverpoolit, duke hedhur gjithë peshën e tij në supet e egjiptianit, por Chiellini beson se spanjolli në këtë ndërhyrje thjesht ka treguar zgjuarsinë e tij djallëzore.

“Ai është mbrojtësi më i mirë në botë”, shkruhet në një fragment në librin autobiografik të Giorgio Chiellinit, përcjell lajmi.net.

“Ata thonë se ai është impulsiv, aspak taktik, se 8 deri në 10 gola pranohet çdo sezon përmes gabimeve të tij, se ai është shumë teknik dhe mund të jetë sulmues, gjë që është e kundërta për mua”.

“Megjithatë, ai ka dy karakteristika që pothuajse askush nuk i ka. Ai di të jetë vendimtar në ndeshjet e mëdha, me ndërhyrje që tejkalojnë çdo logjikë, që madje shkaktojnë lëndime me zgjuarsi gati djallëzore”.

“Ajo në Salah në finalen e vitit 2018 në Ligën e Kampionëve ishte një ndërhyrje mjeshtërore. Ai gjithmonë ka thënë se atë nuk e ka bërë me qëllim, duke e ditur se nëntë nga dhjetë rastet, duke rënë si ai bëri, ai rrezikoi të thyejë krahun e kundërshtarit të tij”